DSB anbefaler at flest mogleg er førebudd på å klare seg sjølv i ei veke i ei krise. Dette fordi kommunane og naudetatane må prioritere dei som ikkje klarar seg utan hjelp i ei krise.

Er du førebudd?

Korleis vil du og dine nærmaste klare dykk dersom straumen blir vekke i ei lengre periode? Kva gjer du dersom vatnet forsvinn? Kva om du ikkje får handla på ei veke? 

På nettsida sikkerhverdag.no finn du informasjon eigenberedskap og korleis du kan førebu deg på ei krise

Kommunen kan informere ut til innbyggjarane på desse måtane:

• informasjon på nettsida www.oystre-slidre.kommune.no 
• informasjon på kommunen sin side på Facebook
• informasjon og varsel via sms-meldingar
• ved fullstendig bortfall av elektronisk kommunikasjon, vil ikkje varslingsmetodane over vere tilgjengelege. Dette kan du lese meir om i punktet om oppmøtestader i Øystre Slidre.
   

Her kan du sjekke at vi har rett kontaktinformasjon om deg (slik at vi kan nå deg på SMS).

På nettsida sikkerhverdag.no finn du råd om informasjon i kriser

Sjølv om du har mista dekning på din mobiltelefon, kan det hende at naudanrop (110, 112 og 113) vil fungere. Dette vil skje dersom det finst mobilleverandørar som har dekning i området. Merk at det er litt større sannsynlegheit for at 112 vil fungere enn dei andre numra.

Ver også merksam på at det ofte vil vere mogeleg å ringe via Wifi, sjølv om mobilnettet er nede. Vi rår deg til å sette deg inn i korleis du gjer dette på din telefon.

Elles vil du kanskje oppleve (om det ikkje er eit fullstendig bortfall av mobilnett) at du kan få signal om du bevegar deg inn i eit anna område.

Kanskje har du naboer som har ein annan mobilleverandør enn deg?

Sjå elles punktet om oppmøtestader i Øystre Slidre ved langvarig bortfall av elektronisk kommunikasjon.

Bortfall av elektronisk kommunikasjon (EKOM) betyr at du ikkje kan ringe, sende sms, bruke internett eller mobilnett. 

Oppmøtestader i Øystre Slidre kommune

Ved langvarig og fullstendig bortfall av elektronisk kommunikasjon vil kommunen normalt opprette oppmøtestader som du kan nytte om du har behov for kontakt med naudetatane (politi, brann eller akutt helsehjelp). Merk at det vil ta tid før oppmøtestadene blir operative.

I Øystre Slidre er oppmøtestadene:

• Moastogo ved Øystre Slidre Helsetun, Bygdinvegen 2120, Heggenes.
• Radisson Blu Mountain Resort Beitostølen, Bygdinvegen 3812, Beitostølen.

På desse stadene vil du møte ein representant som kan varsle naudetatane for deg. Oppmøtestadene er berre meint som ein plass for innbyggjarar som har ein naudsituasjon og som har behov for kontakt med naudetatane. 

Om bortfallet varar over fleire dagar, vil kommunen også truleg oppbemanne oppmøtestadene, slik at dette også vil vere ein stad der du vil kunne motta viktig informasjon.

Legevakt

Legevakta vil fungere som vanleg. Om du har behov for akutt helsehjelp bør du vurdere om det heller er enklare/betre å reise rett til legevakta enn å ta turen om oppmøtestaden.

• På dagtid (08-15) måndag - fredag er legevakta på legekontoret på Heggenes, Bygdinvegen 2136, Heggenes. 
• På kveldstid, natt og i helgene finn du legevakta på Valdres Lokalmedisinske Senter, VLMS, Garlivegen 14, Fagernes.

Ved kriser og ulukker er det viktig at du har tilgang på offisiell informasjon om kva som skjer og kva du bør gjere. Her finn du informasjon om kanalane som norske styresmakter kan nytte for å nå ut til folkesetnaden ved kriser.

På nettsida sikkerhverdag.no finn du informasjon om korleis norske styresmakter varsler i kriser

Det kan vere krevjande å planlegge eigenberedskap for ei veke. Hugs at familie, vennar og naboar kan hjelpe kvarandre om gode løysingar. Finn ut kven som kan trenge di hjelp og kven du sjølv kan få hjelp frå.

Om t.d. naboen din har ein annan mobil- eller internettleverandør enn deg, kan dekningen vere nærare enn du trur!

Les om felles eigenberedskap på nettsida sikkerhverdag.no